పోలీసులు సంయమనం పాటించాలి..నిరసనల్లో యువతను సముదాయించాలి

నిరసనల్లో యువతను సముదాయించాలి: సుప్రీంకోర్టు సూచనలు

Indiabreakingdaily.com – ప ల స ల స యమన ప – న్యూఢిల్లీలో జరిగిన ‘సంసద్ చలో’ మార్చ్‌లో హింసాకాండ సంభవించిన సందర్భంగా సుప్రీంకోర్టు కీలక ఆదేశాలు జారీ చేసింది. యువత రాళ్లదాడులకు పాల్పడినప్పటికీ వారిని ఓపికతో సముదాయించాలని, కఠిన చర్యలకు దూరంగా ఉండాలని న్యాయస్థానం స్పష్టం చేసింది. భద్రతా బలగాలు కూడా సంయమనం పాటించాలని సీజేఐ సూచించారు.

ధర్మాసనం విచారణ

చీఫ్ జస్టిస్ సూర్యకాంత్, జస్టిస్ జోయ్ మాల్య బాగ్చి, జస్టిస్ వి. మోహన్‌లతో కూడిన ధర్మాసనం ఈ పిటిషన్‌ను బుధవారం విచారణకు స్వీకరించింది. రిటైర్డ్ ఎయిర్ ఫోర్స్ అధికారి మనీశ్ కుమార్ సోలంకి దాఖలు చేసిన పిటిషన్‌ను మరో సారూప్య పిటిషన్‌తో జతపరిచారు. పోలీసులు, భద్రతా సిబ్బందిపై అనుచిత భాష ఉపయోగించిన వారిని గుర్తించి కమ్యూనిటీ సర్వీస్ చేయించాలని పిటిషనర్ కోరారు.

వారికి సలహా, కౌన్సెలింగ్ అవసరం. ప్రభుత్వం వైపు నుంచి తీసుకునే కఠిన చర్యలు సామాజికంగా పరిస్థితిని మరింత దిగజారుస్తాయి. మరింత హింసకు దారితీస్తుంది. దానిని నివారించాలి

సీజేఐ సూచనలు

శాంతియుత మార్చ్‌ను ప్రోత్సహించడం ముఖ్యమని సీజేఐ అన్నారు. ఏదైనా సంఘటన జరిగితే పరిస్థితి చేయి దాటిపోకుండా చూసేందుకు పోలీసులు సంయమనం పాటించాలని ఆయన అభిప్రాయపడ్డారు. యువత హింసకు పాల్పడకుండా జాగ్రత్తగా అడుగులు వేయాలని, వారికి కౌన్సెలింగ్ ఇవ్వడమే మంచి మార్గమని సీజేఐ చెప్పారు.

అత్యంత శక్తిమంతమైన సాధనం వినడం. వారు చెప్పేది వినండి, వారు ఎందుకు నినాదాలు చేస్తున్నారో అర్థం చేసుకోండి. కానీ, దానిని శాంతిభద్రతల బాధ్యతలు చూసే సంస్థల విజ్ఞతకే వదిలేద్దాం. ఈ రకమైన పరిస్థితిని ఎలా ఎదుర్కోవాలో మీకంటే, మాకంటే వారికే బాగా తెలుసు

నిర్వాహకులపై చర్యలు అవసరం

పిటిషనర్ తరపున హాజరైన అడ్వకేట్ రిజ్వాన్ అహ్మద్ వాదనలు వినిపించారు. పదిహేను రోజులు గడిచిపోయినా నిర్వాహకుల జవాబుదారీతనం ఏమైందని ఆయన ప్రశ్నించారు. టీవీ చానెల్స్ చుట్టూ తిరుగుతూ యువతను రెచ్చగొట్టే ప్రకటనలు ఇస్తున్నారని, పరిస్థితి చల్లారకుండా చేస్తున్నారని అహ్మద్ పేర్కొన్నారు.

రాజస్థాన్‌లోని ఇటీవలి శాంతిభద్రతల సంఘటనను ప్రస్తావిస్తూ, నిరసనకారులకు వెరిసి ప్రభుత్వాలు వెనుకడుగు వేయకూడదని ఆయన వాదించారు. ఒక యువకుడు మరణించిన సందర్భంలో ప్రభుత్వం వెనుకడుగు వేస్తే అది రాజస్థాన్‌లో ఒక సంప్రదాయాన్ని సృష్టించదా అని ప్రశ్నించారు. రేపు లక్నోలో డిగ్రీ కాలేజీ విద్యార్థులు మరేదైనా డిమాండ్‌తో బస్సులపై రాళ్లు విసిరితే ఉత్తరప్రదేశ్ ప్రభుత్వం కూడా వెనుకడుగు వేస్తుందా అని అహ్మద్ అడిగారు.

రాళ్ల దాడికి పాల్పడ్డ వారిని విచారిస్తే ప్రభుత్వానికి ఇబ్బందికర పరిస్థితి వస్తుందనే కారణంగా వారిని వదిలేయకూడదని ఆయన వాదించారు. ఇది చాలా ప్రమాదకరమైన సంప్రదాయమని, మూడేళ్ల క్రితం రైతులు సింఘూ సరిహద్దులో ఉన్నారని, రేపు జనరేషన్ ఆల్ఫా, బీటా, డెల్టా వస్తారని అహ్మద్ అన్నారు.

పార్లమెంటు ప్రజాస్వామ్య దేవాలయమని, 500 మంది అందులోకి ప్రవేశిస్తే వారిలో ఎవరి వద్దయినా నాటు తుపాకీ ఉందో లేదో ఎలా గుర్తించాలని ఆయన ప్రశ్నించారు. లోపలికి వెళ్లాక వారు కాల్పులు జరిపితే పరిస్థితేంటని అడిగారు. వారు హైవేపైనో, రైలు పట్టాలపైనో మార్చ్ చేయలేదని, ప్రజాస్వామ్య దేవాలయం వైపు మార్చ్ చేశారని, అందులో ప్రతి ఒక్కరినీ జవాబుదారీగా చేయాలని కోర్టుకు విజ్ఞప్తి చేశారు.

మీడియా రిపోర్టింగ్‌పై స్పష్టత

న్యాయస్థానాల్లో విచారణలకు సంబంధించిన ఆడియో, వీడియో క్లిప్‌లను సోషల్ మీడియా లేదా ఇతర డిజిటల్ ప్లాట్‌ఫారమ్‌లలో అప్‌లోడ్ చేయడంపై విధించిన ఆంక్షలు వార్తా సంస్థల రిపోర్టింగ్‌కు ఎలాంటి ఆటంకం కాదని సీజేఐ జస్టిస్ సూర్యకాంత్ బెంచ్ స్పష్టం చేసింది.

గతంలో తామిచ్చిన మధ్యంతర ఉత్తర్వులపై వ్యక్తమవుతున్న అయోమయాన్ని తొలగిస్తూ, మీడియా రిపోర్టింగ్ విధానంపై ఎలాంటి నిషేధాన్ని విధించలేదని న్యాయస్థానం తేల్చిచెప్పింది. గుర్తింపు పొందిన వార్తా సంస్థలు కోర్టు విచారణలు, న్యాయపరమైన పురోగతి, తీర్పుల వివరాలను ప్రజలకు తెలియజేయడానికి పూర్తి స్వేచ్ఛ ఉంటుందని స్పష్టం చేసింది.

అయితే, వార్తలను ప్రసారం లేదా ప్రచురణచేసే క్రమంలో కోర్టు విచారణలకు సంబంధించిన అసలు ఆడియో లేదా వీడియో క్లిప్‌లను ఉపయోగించకూడదు

సుప్రీంకోర్టు సెక్రటరీ జనరల్ లేదా సంబంధిత హైకోర్టుల రిజిస్ట్రార్ జనరల్ ముందస్తు అనుమతి లేకుండా విచారణల వీడియోలను సేకరించడం, ఎడిట్ చేయడం, సోషల్ మీడియాలో పోస్ట్ లేదా రీపోస్ట్ చేయడం, వాటి ద్వారా ఆదాయం పొందడంపై జులై 24న విధించిన నియమాలు యథాతథంగా అమలులో ఉంటాయని న్యాయస్థానం చెప్పింది.

కోర్టుల్లో ప్రత్యక్ష ప్రసారాల రికార్డింగ్‌లను అనుమతి లేకుండా సోషల్ మీడియాలో అప్‌లోడ్ చేయడంపై జర్నలిస్ట్ హర్షిత గ్రోవర్ దాఖలు చేసిన పిటిషన్‌పై విచారణ సందర్భంగా సీజేఐ జస్టిస్ సూర్యకాంత్ బెంచ్ ఈ ఆదేశాలు జారీ చేసింది. ఈ వ్యవహారంలో కేంద్ర ప్రభుత్వంతో పాటు పలు సోషల్ మీడియా సంస్థలకు అత్యున్నత న్యాయస్థానం నోటీసులు జారీ చేసింది.